Um grunnin

Hin Føroyski Bíbliugrunnurin varð settur á stovn tann 28. november 1948, og fýra mánaðir seinni tann 19. mars 1949 kom øll Bíblian á fyrsta sinni út á føroyskum í týðing Victor Danielsens (1894 - 1961).

Tá vóru eini 20 ár liðin síðani Victor fór undir at týða og geva út partar av Bíbliuni. Nýggja Testamentið kom út í 1937. Í 1974 kom endurskoðað útgáva við nøkrum fáum málsligum tillagingum.

Bíblian fæst í trimum vanligum støddum - lummastødd, miðal og stórari - umframt eisini við stórari skrift fyri sjónveik, sum kom út í 1987. Í 1992 varð Nýggja Testamentið lisið inn á 15 ljóðbond, sum tað tekur góðar 20 tímar at lurta eftir.

Bíbliugrunnurin hevur higartil givið Bíbliuna út í 44.000 eintøkum umframt eitt stórt tal av Nýggja Testamentum. Endurprent av Bíbliuni kom til landið í juli 2005 og er tøkt í bókabúðunum.

Í september 2006 er Bíblian gjørd tøk til brúk á fartelefonum, ið hava møguleika fyri dátaflutningi (GPRS) - sí nærri á wap.biblian.fo Í november 2006 er Nýggja Testamentið í ljóðútgávu tøkt á fløgu í MP3 sniði. Í september 2011 gjørdist Bíblian tøk sum smáforrit (App) til iPhone, iPad og Android. Í 2017 kom endurskoðað útgáva við nakað av málsligum tillagingum.